Эйнштейннің миы 9,99 доллардан сатылады
АСТАНА. 28 қыркүйек. ҚазАқпарат - Чикагодағы Медицина және денсаулық сақтау ұлттық мұражайы iPad-тың Альберт Эйнштейн миының суреттерімен таныстыратын қосымшасын ойлап тапты.
Ғұлама миының кескіндеріне үңілу үшін тұтынушылар 9,99 доллар төлеуі тиіс. Бұл туралы «Алаш айнасы» газеті жазады.
Associated Press-тің хабарлауынша, арнайы қосымшаға 1955 жылы патологоанатом Томас Харви түсірген 350 фотосурет орналастырылған. Әуелде Харви миды 250 бөлікке бөліп түсірген екен. Кейін орган Принстон университетінің зерттеушілеріне берілген. Эйнштейн миының бір артықшылығы бар: оның төбе тұстағы бөлігі өзге адамдардікіне қарағанда едәуір үлкен. Енді осы және басқа да ерекшеліктерді iPad-тың кез келген тұтынушысы тамашалай алады. Медицина және денсаулық сақтау ұлттық мұражайының кеңесшісі Стив Ландерстің айтуынша, бұл бағдарламаның арқасында түрлі жаңалықтар ашылуы мүмкін.
