Facebook-тағы ең танымал адам - Криштиану Роналду
АСТАНА. ҚазАқпарат - Мадридтік «Реал» футбол клубының атақты форварды Криштиану Роналду Facebook әлеуметтік желісінде ең танымал адам атанды. 14 қазан, сейсенбідегі жағдай бойынша оған 100 миллионнан астам адам жазылған.
Осыған байланысты спортшы арнайы бейнемәлімдеме жасады. «Баршаңызға рахмет, Facebook-та 100 миллионнан астам досым бар», - деп атап өтті ол. - Мен осыншама цифрға қол жеткізгеніме өте қуаныштымын».
Қазіргі уақытта Криштиану Роналду - осы әлеуметтік желідегі ең көп «ұнайды» белгісін алған әлемдегі жалғыз адам, деп хабарлады ТАСС.
Футболшының парағындағы ең көп 3,4 миллион «лайк» жинаған - «Балаларды қорғау күнін ұлыммен өткізгеніме қуаныштымын!» деген хабарламамен сүйемелденген баласымен бірге түскен фотосуреті.
