«Farabi hub» - ғылымды өндіріске енгізуді жеделдетеді

АСТАНА. KAZINFORM - Мемлекет басшысы Қасым-Жомарт Кемелұлы Тоқаев экономикалық және әлеуметтік дамудың негізгі басымдығы ретінде университет ғылымын және инфрақұрылымын дамыту маңыздылығын үнемі назарда ұстап келеді.

Осыған сәйкес, Әл-Фараби атындағы Қазақ ұлттық университетінде «Farabi Hub» инновациялық өнімдер мен жоғары технологиялық жобалар орталығы бой көтерді.

Фото: Әл-Фараби атындағы ҚазҰУ-дың баспасөз қызметі

ҚазҰУ-дың 90 жылдық мерейтойы аясында ашылған хабтың мақсаты – озық білімге, технологиялар мен ресурстарға қол жеткізуді қамтамасыз ете отырып, ғылыми әзірлемелер мен технологиялық идеяларды нақты экономикаға енгізуді жеделдету.

Бұл туралы Әл-Фараби атындағы ҚазҰУ Басқарма төрағасы-Ректоры Жансейіт Түймебаев Әл-Фараби атындағы Қазақ ұлттық университетінде Алматы қаласының әкімдігімен бірлесіп ұйымдастырылған «Ғылым, бизнес және өндіріс ықпалдастығы» атты форумда арнайы тоқталды.

Фото: Әл-Фараби атындағы ҚазҰУ-дың баспасөз қызметі

– «Farabi Hub» университеттермен және ғылыми институттармен, сондай-ақ инвестор компаниялармен әріптестік байланыс орнатады. Бірлескен зерттеулер жүргізіліп, жаңа технологиялар әзірленеді. Соңғы үлгідегі құрылғылармен жабдықталған ғылыми зертханалар ғылым мен технологияның әртүрлі салаларында зерттеулер жүргізіп, тәжірибе жасауға мүмкіндік береді, – деді оқу орнының басшысы.

Мұнда ZTE, «ZooStan» Орталық Азияны зерттеу жөніндегі халықаралық ғылыми-зерттеу орталығы, Солтүстік-батыс политехникалық университетімен бірлескен микроспутниктер зертханасы, Биология және биотехнология зертханасы, Химия және химиялық технология зертханасы, Заманауи қолданбалы физика және жоғары технологиялар зертханасы, «Робототехника және мехатроника RoboMech» ғылыми-білім беру орталығы, Дәрілік өсімдіктерді ғылыми-зерттеу орталығы, Сот сараптамалары орталығы, Ғылыми-технологиялық парк орналасқан.

«Farabi Hub» орталығының жалпы ауданы 5000 шаршы метрді құрайды.

Фото: Әл-Фараби атындағы ҚазҰУ-дың баспасөз қызметі