Филиппиндік бойжеткен Ғалам аруы атанды

АСТАНА. ҚазАқпарат - 24 жастағы филиппиндік ару Катриона Грэй «Ғалам аруы-2018» байқауында жеңімпаз атанды, деп хабарлайды ҚазАқпарат тілшісі CNN Philippines агенттігіне сілтеме жасап.

Екінші орынға Венесуэладан келген Стефани Гутьеррес лайық деп танылды.

Жалпы, Катриона Грэй - Ғалам аруы атанған төртінші филиппиндік бойжеткен. Бұған дейін Филиппиннен 1969 жылы - Глория Диас, 1973 жылы - Марджия Моран және 2015 жылы Пия Вурцбах осы байқауда бас жүлдені иеленген болатын.  

Ал өткен жылы оңтүстікафрикалық модель Деми-Лей Нель-Петерс оқ бойы озық шығып, ғаламның ең сұлу аруы атанды.

Айта кетейік, біз бұған дейін алматылық Сәбина Әзімбаеваның аталмыш байқауға қатысатыны жөнінде жазған едік. Қазақстандық үміткер үздіктер қатарына енген жоқ.