Фируза Шәріпова UFC тарихындағы үздік чемпионды нокаутқа жібермек
АСТАНА. ҚазАқпарат - Кәсіпқой бокста екі салмақ санатындағы әлем чемпионы, қазақстандық Фируза Шәріпова UFC чемпионы бразилиялық Аманда Нуньесті жекпе-жекке шақырды, деп хабарлайды Sports.kz порталы AllFight.Ru-ға сілтеме жасап.
«Кіші Рой Джонс UFC президенті Дана Уайттың досы. Қазір біз Рой Джонстың командасымен жұмыс істеп жатырмыз. Олардан екі салмақ санатындағы UFC чемпионы Аманда Нуньеспен жекпе-жек ұйымдастыруға көмектесуін сұраймын. Мен оны нокаутқа жібергім келеді. Аманданы Кристина Жустиноны жеңгенімен құттықтаймын, ол тамаша өнер көрсетті. Осы жекпе-жекті асыға күтіп едім, өйткені оның жеңімпазымен кездескім келеді. 2019 жылы осы жекпе-жекті ұйымдастыруын сұраймын», - дейді Фируза.
Еске сала кетейік, Фируза 2019 жылдың көктемінде WBC тұжырымы бойынша әлем чемпионы, фин боксшысы Ева Вальстреммен айқасады. Егер жеңсе, екінші жартылай жеңіл салмақтағы үздік боксшы атанады.
