Фируза Шәріпованың кезекті қарсыласының кім екені белгілі болды

АЛМАТЫ. ҚазАқпарат - Былғары қолғап шебері, WIBA, WBU, IBO Championship және WBC Silver бойынша екі түрлі салмақ категориясында бақ сынасатын Фируза Шәріпованың кезекті қарсыласы кім екені анықталды, деп хабарлайды ҚазАқпарат тілшісі.

Қазақстандық боксшы қыз испаниялық былғары қолғап шебері Мириам Гутьерреспен кездеседі.

Испания чемпионы, Әлем және Еуропа чемпионатының жүлдегері М. Гутьеррес кәсіби бокс алаңында 7 рет жұдырықтасқан. Жеті жекпе-жекте де жеңіс тұғырына көтерілген. Оның 3-уінде қарсыласын уақытына жетпей тізе бүктірген.

Жекпе-жектің қашан әрі қайда болатыны әзірге белгісіз.

«Бұл жекпе-жек Фирузаның Ева Вальстреммен кездесуіне дайындық болмақ. Толық ақпарат жекпе-жекке қағаз жүзінде санкция алғанда бір-ақ белгілі болады», - деді Шәріпованың менеджері Сергей Завилейский.

Айта кету керек, Фируза Шәріпова 30-желтоқсанда Алматыда бельгиялық Джемилла Гонтарюкты тізе бүктірген болатын.

Енді Фируза фин спортшысы Ева Вальстреммен 2018 жылдың қазанында Монакода кездеседі.