Флоридалық пастор қыркүйектің 11-інде Құранды өртеуден бас тартты
АСТАНА. Қыркүйектің 10-ы. ҚазАқпарат - Өз приходына келушілерді қыркүйектің 11-інде Құранның көшірмесін өртеуге шақырған флоридалық пастор Терри Джонс бұл шараны өткізуден бас тартқанын мәлім етті, деп хабарлады бейсенбі күні американдық бұқаралық ақпарат құралдары.
Dove World Outreach Center шіркеуі пасторының айтуынша, Нью-Йорктегі жаңа мешіттің лаңкестер жойған Дүниежүзілік сауда орталығы мұнараларынан қашықтау салынатындығы туралы оған уәде берілгеннен кейін, ол ертеңге жоспарланған акциядан бас тартқан-мыс.
«Әрине, біз қазір кімде-кімнің Құранды өртегеніне қарсымыз. Біз адамдарды олай етпеуге шақырамыз және сеніміміз нық. Қазір ондай әрекетке баратын уақыт емес»,- деді пастор бейсенбі күні Гейнсвилл қаласында баспасөз мәслихатында сөйлеген сөзінде.
