Франция президенті мінберде сөйлеп тұрғанда мылтық атылды
АСТАНА. ҚазАқпарат - Франция ел президенті Франсуа Олланд сөз сөйлеп тұрғанда полиция мергенінің мылтығы байқаусызда атылып кетті. Қаңғыған оқтан даяшы және тағы бір қызметкер жарақат алды, деп хабарлайды Би-Би-Си агенттігі.
Оқыс оқиға Францияның батысындағы Вильоньон коммунасында болды, онда Олланд жүрдек пойыздардың жаңа желісін ашу салтанаты кезінде сөз сөйлеп жатқан. Оқ атылған кезде президент сөзін тоқтатып: «Меніңше айтарлықтай ештеңе болмаған секілді», деп мәлім етті.
Жергілікті БАҚ-тардың хабарлауынша, мерген қаруының оқ атылмайтын тетігін басуды ұмытып кеткен. Зардап шеккендердің екеуінің де аяғы жараланған. Олар қазір ауруханаға жеткізілді. Полиция осы оқиғаға қатысты тергеуді бастады.
