Францияда мүгедектерге арналған демалыс үйі өртенді, 11 адамның қаза болғаны айтылуда
АСТАНА. ҚазАқпарат – Францияда мүмкіндігі шектеулі адамдарға арналған демалыс үйінен өрт шығып, болжам бойынша 11 адам қаза болды. Бұл туралы ҚазАқпарат Еuronews-ке сілтеме жасап хабарлайды.
Франция билігі өрттен 11 ересек адам «көз жұмған болуы мүмкін» деп мәлімдеді.
Елдің ішкі істер министрі Жеральд Дарманен Twitter-де бүгін таңертең Германия шекарасына жақын орналасқан Винценхайм шағын қаласындағы мүгедектерге арналған мекемеде өрт шыққанын жазды.
«Өкінішке қарай, қаза болғандар бар», - деді ол.
Жоғарғы Рейн аймағының жергілікті әкімшілігі өрт Винценхаймдағы мүмкіндігі шектеулі жандар демалатын жеке үйде таңғы сағат 6:30-да басталғанын мәлім етті. 17 адам эвакуацияланды, 1 адам ауруханаға жеткізілді.
Оқиға орнына Францияның премьер-министрі Элизабет Борн шықты.
