Француздар Шымкенттегі түрменің қабырғасына қызғалдақ суретін салды
Париждің үш суретшісі Қазақстанның үшінші мегаполисіне 10-шы қараша күні ашылатын Француз альянсының арнайы шақыруымен келді. Франциялық граффист Лорелланың сөзінше, өзгеше ұйымдастырылған шара Қазақстан мен Франция елдерінің достастығын нығайту мақсатында қолға алынып отыр. Сондай-ақ, қылқалам шебері түзеу мекемесінің қабырғаларында бостандық белгісі саналатын қыз бен Шымкенттің логотипі қызғалдақты және шым шаһарға ұшып келген ұшақ бейнеленетінін айтады. Ал, сурет салу жұмыстарын бес күн ішінде аяқтауды жоспарлап отыр екен. 
«Негізгі идеяны жергілікті суретшілермен бірлесе отырып жасадық. Біз бұл мекемені кездейсоқ таңдаған жоқпыз. Түрме тас жолдың бойында орналасқан әрі қабырғалары да әппақ. Ол жерге келу де оңай. Сонымен қатар қала тұрғындары суреттерімізді оңай көре алады»,- дейді Лорелла.
