Футбол: «Ақтөбе» Достастық кубогының ширек финалына шықты
АСТАНА. Қаңтардың 19-ы. ҚазАқпарат /Ернұр Ақанбай/ - Мәскеуде өтіп жатқан футболдан ТМД және Балтық елдері чемпиондарының кубогы үшін турнирде ел намысын қорғап жатқан «Ақтөбе» ширек финалға шықты,
деп хабарлайды ҚазАқпарат.Қазақстан футбол федерациясының мәліметінше, «Ақтөбе» топтық турнирдегі бірінші ойынын Армения чемпионы - «Араратпен» өткізіп, 3:1 есебімен жеңіске жетсе, екінші кездесуінде Ресей чемпионы - «Рубиннен» 2:0 есебімен басым түсті. Ал ертең біздің команда өз тобындағы соңғы матчын Өзбекстан чемпионы - «Пахтакормен» өткізеді. Екі кездесуде 6 ұпай жинаған жерлестеріміз үшінші ойынның нәтижесіне қарамастан плей-оффқа жолдама алып отыр. Осылайша «Ақтөбе» үшінші ұмтылыстан кейін барып, Достастық кубогының келесі кезеңіне өтті. Айта кетейік, «Ақтөбе» бұған дейін аталмыш турнирге екі мәрте қатысып, топтық турнирден аса алмаған еді.
