Футболдағы жемқорлыққа қатысты ұсталған Боливия ФФ басшысы тергеу аяқталғанға дейін қамауда болады

АСТАНА. ҚазАқпарат - Сыбайлас жемқорлық жасағаны үшін күдікті деп танылған Боливия Футбол федерациясының президенті және Оңтүстік американдық футбол конфедерациясы (КОНМЕБОЛ) қазынашысы Карлос Чавес тергеу аяқталғанға дейін қамауда қалады, деп хабарлады France Presse агенттігі.

Чавес пен Боливия Футбол федерациясының бас хатшысы Альберто Лосада өткен жұмада тұтқындалған болатын. Сот Лосада тергеу аяқталғанға дейін үй қамағында болады деп қаулы шығарды. Маусымның басында Боливия президенті Эво Моралес құқық қорғау органдары өкілдерінен ФИФА-дағы сыбайлас жемқорлыққа қатысты жанжалға байланысты Чавес пен басқа да футболға қатысты шенеуніктерді тексеруді сұраған.