19:15, 27 Қыркүйек 2021 | GMT +6
Футболдан Қазақстан чемпионаты: «Ақжайық» пен «Қайсар» тең ойнады
ОРАЛ. ҚазАқпарат - Футболдан Қазақстан чемпионатының 22-турында «Ақжайық» өз алаңында Қызылорданың «Қайсарын» қабылдады, деп хабарлайды ҚазАқпарат тілшісі.
Бұған дейін оралдықтар 29 ұпаймен алтыншы орында тұрса, «Қайсар» небәрі 15 ұпаймен 13-сатыда еді.
Бірінші таймда алаң иелері көбірек шабуылдағанымен, есеп ашылған жоқ.
Екінші кезеңде 65-минутта «Ақжайық» сапындағы ресейлік Евгений Козлов мергендік танытты.
Алайда көп ұзамай қарсы шабуылдардың бірінде қонақтардан литвалық легионер Каролис Лаукжемис таразы басын теңестіріп кетті - 1:1.
Украиналық маман Владимир Мазяр жаттықтыратын «Ақжайық» командасы келесі ойынын 2 қазанда Алматыда ел чемпионы «Қайратпен» өткізеді.
Ал бірінші лигаға түсіп қалу қаупі анық төнген қызылордалықтар Ақтөбеде ойнайды.
Еске сала кетейік, бұдан бұрын «Жетісу» мен «Ақжайықтың» тең тарқасқанын жазған болатынбыз.
Фото: Айбатыр Нұраш