Футзалдан әлем чемпионаты: Қазақстан Черногорияны 7:0 есебімен жеңді
АСТАНА. ҚазАқпарат - Футзалдан Қазақстан құрамасы бүгін әлем чемпионатының екінші іріктеу сатысындағы кезекті ойынын Черногорияға қарсы өткізді, деп хабарлайды ҚазАқпарат тілшісі.
Кездесу барысында қазақстандық футзалшылар сенімді ойын көрсетті.
Нәтижесінде бірінші кезеңде ел құрамасынан Жуниор Дуглас 1-минутта есеп ашса, Абдирасул Әбдіманапұлы – 3, Арнольд Кнауб 14-минуттарда есепті үстемелей түсті.
Екінші кезеңде Альберт Ақбалықов 21-минутта мергендік танытса, Біржан Оразов 24 және 25-минуттарда көздеген нысанадан мүлт кеткен жоқ. Ойын нүктесін Азат Валиуллин 39-минутта қойды.
Осылайша ел футзалшылары қарсыласынан 7:0 есебімен басым түсті.
ҚР құрамасы бесінші топта сынға түседі. Қарсыластары - Словения мен Черногория.
Бұған дейін қазақстандық футзалшылар өз алаңында Словенияны 2:0 есебімен тізе бүктірсе,сырт алаңда Черногорияны 5:1 есебімен жеңді.
Өз тобында тоғыз ұпаймен бірінші орын алған Қазақстан құрамасы бір тур бұрын үшінші іріктеу кезеңіне жолдама алды.
Енді құрамамыз 2023 жылдың 8 наурызында Словениямен сырт алаңда тағы бір мәрте кездеседі.
Футзалдан Қазақстан құрамасы әлем чемпионатының финалдық сатысында 2000, 2016, 2021 жылдарда сынға түсіп, 2021 жылы төртінші орынға табан тіреген еді.
Фото: sports.kz
