«G8» бен «G20» жаңа әлемдік қаржылық-экономикалық архитектураның қалай болатынына жауап бере алмауда - Н. Назарбаев
Бүгін Астанада өтіп жатқан Еуразия медиа форумы барысында сөз сөйлеген ҚР Президенті Нұрсұлтан Назарбаев осылай мәлімдеді.
Сөз арасында Елбасы бүгінгі таңда «G-20» шеңберінде жаһандық экономикалық шешімдер іздестіруді белсенді ете түсудің маңыздылығына тоқталып өтті. Ал бұл бағытта Санкт-Петерборда өтетін осындай жиынға Қазақстан да шақырылған.
«Жалпы біз жаһандық дамудың қазіргі сатысындағы әлемнің мүлдем жаңа жағдайға өтуіндегі басты ерекшеліктерді байқап отырмыз. Өкінішке қарай, осы жылдар ішінде «G-8» де «G-20» да әлемдегі жаңа қаржылық-экономикалық архитектураның қандай болатынына, экономика мен саясат қайда баратынына жауап бере алмай келеді. Жауап әзір де жоқ», - дей келе, Елбасы бұндай мәселеге барша мемлекеттер атсалысуы тиістігін, сондықтан да былтырғы жылы «G-Global» идеясы дүниеге келгенін атап өтті.
Қазақстан Президентінің айтуынша, бұндағы басты идея - бұл ең алдымен әлемдік саясаттың барлық мәселелері бойынша барша жаһандық қауымдастықты пікірталасқа шақыру. Сонымен қатар, Мемлекет басшысы бүгінгі таңда Интернет желілерінде «G-Global» коммуникациялық алаңы табысты жүзеге асып жатқанын, оған миллиондаған пайдаланушылар қосылып, 50-ден астам мемлекет өздерінің ұсыныстарын енгізгенін айтты.
«ХХI ғасырда осындай негізде жұмыс істеу арқылы кез келген жаһандық проблеманың тиімді диалогын қалыптастыруға, қатысушылар үшін тиімді шешімдерге келуге мүмкіндік болады. «G-Global»-дың басты идеясы жаһандық даму парадигмасының хаосқа ұрынған динамикасының орнына оңтайлы балама ұсыну. Мен біздің бірегей әлем сындарлы көпполярлық жағдайында өмір сүруге лайықты деп ойлаймын», - деді Н. Назарбаев.