Гаитиде «Мэтью» дауылы құрбандарының құрметіне үш тәулік аза тұту күні жарияланды
АСТАНА. ҚазАқпарат - Өткен аптада елде мыңға жуық адамның өмірін қиған «Метью» дауылы құрбандарының құрметіне Гаити билігі 3 тәулік аза тұту күнін жариялады, деп хабарлайды Би-би-си.
Құтқарушылар елде тырысқақ дерті тарап жатқанын растады. Елдің денсаулық сақтау министрлігі қаза тапқандардың саны қазіргіден де көп болуы мүмкін екенін айтып отыр.
Гаити - әлемдегі ең кедей елдердің бірі. Ал бұл жолғы дауыл соңғы 10 жыл ішінде Кариб бассейнінде болған ең қуатты дауыл болып шықты: Сафир-Симпсон шкаласы бойынша бесінші деңгейге жеткен. Желдің жылдамдығы 230 км/сағатқа дейін барған.
Қазір дауыл АҚШ-тың оңтүстік-батыс штаттарына жетті, бірақ жылдамдығы бәсеңдеп, 120 км/сағатқа дейін түсті. Бұған қарамастан жұма күні Барак Обама табиғаттың тосын мінезіне дайын болуды тапсырды.
Сенбі күні АҚШ-та аталған дауыл салдарынан 10 адам қаза тапқаны мәлім болды.
