Гаитидің солтүстігінде нөсер жауын салдарынан 13 адам қаза болды
АСТАНА. KAZINFORM – Гаитидің солтүстігінде жауған нөсер жауын кемінде 13 адамның өмірін қиып, мыңдаған үйге зақым келтірді, деп хабарлайды Reuters агенттігі.
Метеоқызмет жұманың кешіне дейін елдің барлық өңірінде дерлік найзағайдан қауіп бар екенін ескертті. Сондай-ақ су тасқыны болуы да ықтимал.
Кап-Аитьен қаласының оңтүстік-шығыс өңірінде жауын салдарынан көшкін жүріп, бірнеше үйді қиратты, 12 адам мерт болды, деп мәлімдеді Гаитидің төтенше жағдайлар жөніндегі агенттігі бейсенбі күні жарияланған мәлімдемесінде.
2 мыңнан астам үйді су басты.
Төтенше жағдайлар жөніндегі агенттік елдің солтүстігінде көп мал қырылып, орталық өңірлерде де фермалардың бұзылғанын айтты.
