Ғалымдар: Электрондық ойыншықтар балалардың сөйлеу қабілетін тежейді

АСТАНА. ҚазАқпарат - Америкалық мамандар түрлі электрондық ойыншықтар сәбилер үшін пайдасыз, олар тіпті сөйлеу қабілетінің дамуын бәсеңдетуі мүмкін деген тоқтамға келді, деп жазады шетелдік БАҚ.

Зерттеу кезінде Солтүстік Аризона Университетінің мамандары 10 айдан 16 айға дейінгі сәбилерді бақылады. Қатысушыларға 3 түрлі ойыншықтар беріледі: бірінші топқа электрондық (балаларға арналған ноутбуктер, ұялы телефондар), екінші топқа дәстүрлі ойыншықтар (пазлдар, кубик, приамида), сондай-ақ келесі топұа жануарлардың, геометриялық фигуралар салынған кітаптар берілді. Ата-аналар кезектесіп баланы әрқайсысымен ойнатып шыққан.

Нәтижесінде электрондық ойыншықтармен ойнағанда балалар ата-аналарының сөздерін дұрыс елемей, сөздерді аздау есте сақтайды. Ал пирамидалармен, пазлдармен ойнаған балалар керісінше көбірек сөзді ұғып отырған. Ірі суреттері бар кітаптар да оң әсер еткен.

Ғалымдар ата-аналарға баланың танымдық деңгейін кеңейтуге арналған ойыншықтар мен суретті кітаптар берген дұрыс деген кеңес айтады. Сондай-ақ қазіргі кезде балалардың тұйықтығы, еске сақтау қабілетінің төмендеуі көп жағдайда электронды ойыншықтарға оның ішінде планшеттерге байланысты деп есептейді.