Газа секторында жанармай тапшылығына байланысты ауруханалар жұмысын тоқтатуға мәжбүр
АСТАНА. KAZINFORM — Израиль шабуылдарының жалғасуы және жанармай тапшылығы жағдайында Газа секторындағы ауруханалар жақын күндері толықтай жұмысын тоқтатуы мүмкін. Бұл туралы Газа секторындағы Денсаулық сақтау министрлігі мәлімдеді, деп жазды Анадолы агенттігі.
Министрліктің мәлімдемесінде израильдік әуе шабуылдары, сондай-ақ гуманитарлық көмек пен жанармай жеткізуге қойылған шектеулер Газа ауруханаларын толық тоқтап қалу қаупіне әкеліп отырғаны атап өтілген.
— Жанармай қорының таусылуына байланысты ауруханалардың жұмысын тоқтату үшін санаулы күндер ғана қалды. Газа секторындағы медицина мекемелеріндегі жанармай дағдарысы өте қауіпті деңгейге жетті, — делінген мәлімдемеде.
Министрлік Израильдің қоршау жағдайында өмірлік маңызы бар бөлімшелердің жұмысын тоқтатуы гуманитарлық апатты ушықтыратынын, ал науқастар мен жаралылардың өміріне тікелей қауіп төнетінін мәлімдеді.
Сондай-ақ, ауруханаларға жанармай жеткізуге тыйым салынуына байланысты медициналық қызмет көрсетуде үзілістер басталып кеткені, ал адамдардың өмірін құтқару барған сайын мүмкін болмай бара жатқаны атап өтілді.
— Гуманитарлық апаттың алдын алу үшін ауруханаларға дереу жанармай жеткізілуі тиіс, — делінген мәлімдемеде.
Газада әлі жұмыс істеп тұрған медициналық мекемелерде аппараттар мен өмірді қолдаушы жүйелерге электр энергиясы тек жанармаймен жұмыс істейтін генераторлар арқылы беріліп отыр.
Израиль енгізген гуманитарлық көмек, дәрі-дәрмек және жанармай жеткізуге қойылған шектеулер аппараттық ем алып жатқан науқастар мен жаралылардың өмірін үлкен қауіпке тіреді.
2023 жылғы 7 қазаннан бері Израильдің Газа секторына жасаған шабуылдарының салдарынан кемінде 65 344 палестиндік қаза тауып, тағы 166 795 адам жарақат алған.
БҰҰ Бас хатшысы Бас Ассамблеяда БҰҰ-ның 80 жылдығына арналған салтанатты жиында сөйлеген сөзінде Таяу Шығыстағы жағдай төзгісіз және сағат санап нашарлап бара жатқанын айтқан еді.
