«Газды шектен тыс жағатын компаниялар жазаланады» - республикалық басылымдарға шолу

АСТАНА. 6 наурыз. ҚазАқпарат - Қазақ ақпарат агенттігі республикалық басылымдарда 6 наурыз, сейсенбі күні шыққан өзекті материалдарға шолуды ұсынады.

***

«Егемен Қазақстан» басылымы бүгінгі санында «Жұмыспен қамту жайымен танысты» атты мақала басты. Басылымның жазуынша жексенбі күні Шығыс Қазақстан облысына іссапармен Үкімет басшысының орынбасары Ербол Орынбаев бастаған жұмыс тобы келді.  Вице-премьер бастаған топ ал­дымен атбасын Глубокое кентіндегі еңбекпен қамту орталығының жұмысымен жете танысып, «Жұмыспен қам­ту-2020» бағдарламасының «Ауыл­дағы кәсіп­кер­лікті дамытуға жәр­дем­десу» атты екінші бағыты аясында несие алған кредиттік ұйым­дардың мүшелерімен кездесті. Орталық мамандары осы жылы 158 адамға 368 миллион тең­генің несиесін беруді, 106 әлеу­меттік жұ­мыс орнын құруды және жастар тә­жі­рибесіне он адам­ды қатыс­ты­рып, 156 тұрғынды кәсіби дайын­дық­тан өт­кізуді көздеп отыр. Бағ­дар­лама нәти­жесі көзге көрініп тұр­ғандық­тан несие алу­ға ниет білдірген­дердің саны ауданда артып келеді. Осы жерде Үкімет басшы­сы­ның орынбасары шағын несие алып өз кәсіптерін дөңгелетіп кеткен бір топ аудан тұрғынымен жүздесті. Солардың бірі - оралман Ерсін Әлмет екі миллион теңге несие алып, ірі қара өсіру­де, қазір ол төрт адамға жұмыс беріп отыр. Ал Майрагүл Өскен­бай несиеге іс тігу машиналарын сатып алған, ол да жерлестерін жұмысқа тартыпты. Қазір ұлттық киім-кешектер тігіп, сау­далауда, өнімі өтімді, сұраныс же­тер­лік. Кәсіпкерлер мемлекеттік бағ­дар­ламаның өңірде аса тиімді жүзеге асырылып жатқанын айтып, жеке істерін ашуға мүмкіндік берген осын­дай бағдарламаға бастамашы болған ел Президенті Нұр­сұл­тан Назарбаевқа алғыстарын білдірді.

 

Бүгінгі күні Жаңаөзендегі жағдай қалыпқа түсіп отыр. Өндіріс орындары, әлеуметтік нысандар жұмысы жолға қойылды. Бұл ретте қоғамдық қабылдау бөлімдері Ақтауда да, Жаңаөзенде де өз проблемаларын айтып, ақыл-кеңес, көмек сұрап келгендерге мүмкіндігінше жәрдем көр­сетуді мақ­сат етіп жүр. Соны сезінген Жаңаөзен тұрғын­дары атынан «Нұр Отанның» қалалық филиалына өткен жылы ғана 709 арыз түскен. Ал осы жыл­дың екі айындағы өтініш хаттар саны 237-ге жетіп отыр. Оның 130-дан астамы өздерін жұмысқа ор­наластыруға көмек сұрапты. Өткен апта мәліметі бойынша 71 азаматтың арызы қанағаттан­ды­ры­лған. Айтылғанға қоса біраз азаматтар қала­н­ың еңбек бөліміне де бар­ған. Оларда түрлі-түр­лі жағдайлар көтеріл­ген. Сондықтан мәселені оң шешу үшін әкімдікпен, өндіріс орындарымен, Нұр Отанның облыстық филиалымен қоян-қол­тық бірігіп жұмыс жасауға тура келуде. Бұл туралы «Егемен Қазақстан» басылымының бүгінгі санындағы «Жаңаөзенге қатысты жәйттер» атты мақаладан оқыңыздар.

***

«Шағын несие ұйымдарының жұмысын реттеп, бір жүйеге келтіру жайлы менің айтып жүргеніме бес жылдан асып кетті. Ұлттық банк Микроқаржылық ұйымдары қауымдастығының осы жанайқайын естіп, содан нәтиже шығарғалы жатқаны бізді қуантады. Өйткені бұл салада, жұмысын ұқыпты жүргізіп отырған мекемелер де бар, сонымен қатар алаяқтардың жүргені де жасырын емес. Сол үшін осы саланы біраз реттеу керек және таза, салықтарын дер кезінде төлейтін мекемелер нарықта қалу керек те, жұмысы түсініксіз, күңгірт мекемелер кетуге тиіс»,-дейді Қазақстанның Микроқаржылық ұйымдары қауымдастығы директорлар кеңесінің төрағасы Шалқар Жүсіпов. Оның пікірінше, Заңда осы мәселенің бәрі ескерілген және осы қалпында қабылданады деген үмітіміз бар. Егер расында да заң осы қалпында қабылданар болса, онда елімізде 1756 емес, 250 - 300 шамасында шағын несие ұйымдары қалады. Бұл сұхбат «Айқын» басылымының бүгінгі санында  «Микроқаржы саласында күрделі кезең артта қалды» атты тақырыппен жарияланған.

Осы басылымның жазуынша, Қазақстан - «газды алауларды босқа жағуды қысқарту және ауаға зиянды заттар тастауды төмендету» жөнінен «әлемдік көшбасшы». Мұндай жоғары бағаны Дүниежүзілік банк берген: ол спутниктік мәліметтерге сүйене отырып, Қазақ елінің небары бес жыл ішінде, мұнай өндіру кезінде шығатын ілеспе газды жағуды үштен бірге қысқартқандығын, осылайша ауаға CO2 шығаруды 6 млн тоннаға дерлік азайтқанын анықтаған. Бірақ соған қарамастан, еліміз Иран, Ирак, Алжир, Ангола, Сауд Арабиясы, Венесуэла қатарында «көгілдір отынның» үлкен көлемін кәдеге жаратпай, өртеп жіберіп жатқан мемлекеттердің «топ-тізімінде» тұр. Осы орайда кеше ел Үкіметі газды шектен тыс артық жағатын компанияларға жаза қолданатынын жариялады. Ол қандай жаза. Бұл туралы «Айқын» басылымының бүгінгі санындағы «Газды шектен тыс жағатын компаниялар жазаланады» атты мақаладан білуге болады.

***

Қазақстан Корей халық демократиялық республикасының ядролық қару мен алыс қашықтыққа бағытталған зымырандарды сынауға мараторий жариялап, уранды байыту жұмыстарын тоқтатып, МАГАТЭ инспекторларын Йонбендегі ядролық нысанға жіберу жөніндегі шешіміне қанағаттанды. Кеше Сыртқы істер министрлігінің халықаралық ақпарат комитеті төрағасының орынбасары, ресми өкіл Алтай Әбибуллаев осындай мәлімдеме жасады. Оның сөзінше, Қазақстанның сыртқы істер министрлігі КХДР-ның осы бағыттағы қадамдары Корей жартылай аралындағы 6 бағытты қамтитын  келіссіөздердің жандануына ықпал етуі мүмкін. Бұл мәселе жөнінде «Казахстанская правда» басылымының бүгінгі санындағы «К всеобщей денуклеризаций» атты мақаладан оқыңыздар.