Геннадий Головкин қолдау білдірген қазақстандықтарға алғыс айтты
НҰР-СҰЛТАН. ҚазАқпарат – Украиналық боксшы Сергей Деревянченконы жеңген Геннадий Головкин жанкүйерлеріне алғыс білдірді, деп хабарлайды «ҚазАқпарат» ХАА тілшісі.
«Барлығыңызға қолдау білдіргендеріңіз үшін рахмет! Аренада болғандарға да, көгілдір экраннан тамашалағандарға да рахмет! Сіздер кереметсіздер!» - деп жазды Геннадий Головкин Instagram желісіндегі парақшасында.
Еске сала кетейік, Геннадий Головкин украиналық боксшы Сергей Деревянченко арасындағы жекпе-жектің жеңімпазы атанды. Бокстың басты оқиғасы Нью-Йорктегі Madison Square Garden аренасында өтті.
Айқас 12-ші раундқа дейін жалғасты. Төрешілердің шешімімен, жекпе-жек Геннадий Головкиннің жеңісімен аяқталды. Осылайша, қазақстандық былғары қолғап шебері IBF және IBO тұжырымдарының белдігін қайтарып алды.
Бұл жекпе-жек 37 жастағы қазақстандық боксшы үшін 42-ші атанды. Бүгінде оның қоржынында 40 жеңіс бар.
Бұған дейін Головкинді жеңісімен Елбасы Нұрсұлтан Назарбаев пен Мемлекет басшысы Қасым-Жомарт Тоқаев құттықтаған еді.
Автор: Ақбота Күзекбай
