Германияда соғыстан қалған бомба табылып, 16 мың адам эвакуацияланды
НҰР-СҰЛТАН. ҚазАқпарат - Германияда Екінші дүниежүзілік соғыстан қалған бомба табылып, 16 мың адам эвакуацияланды, деп xабарлайды ҚазАқпарат Frankfurter Rundschau басылымына сілтеме жасап.
Германияның Майндағы Франкфурт қаласында ІІ Дүниежүзілік соғыстан қалған бомба табылып, 16 мың тұрғын қауіпсіз жерге көшірілді.
Салмағы 500 кг снаряд Еуропа орталық банкі ғимаратының алдындағы құрылыс жұмыстары кезінде табылды.
inFranken.de басылымының жазуынша, снаряд Америкада жасалған. Бомбаны залалсыздандырмас бұрын 1 км радиустағы кеңселер мен тұрғын үйлерден адамдарды түгел
эвакуациялауға шешім қабылданған. Аталған шеңберде банк ғимараты, теміржол вокзалы, қаладағы электр пойыздардың аялдамалары, полиция учаскесі, қарттар үйі, зоопарк, тұрғын үйлер - ұзын-ырғасы 1000-нан астам ғимарат бар.
Билік өкілдері үйме-үй кіріп тексеріп жүр. Жалпы 16,5 мыңнан астам эвакуацияланады.
Мамандардың айтуынша, бомбаны залалсыздандыруға 4 сағаттай уақыт кетеді.
