Германияда теміржолшылар ереуілі бүкіл ел бойынша көлік қозғалысын тоқтатты
Deutsche Bahn бейсенбіде жұмыс уақытын күрт қысқартты: кәсіподақ жалақы мен жұмыс уақытына қатысты өткір дау кезінде қысымды күшейту үшін 20 сағаттық ереуілге шықты. Kazinform агенттігі бұл туралы Euronews-ке сілтеме жасап хабарлайды.
Германияда жұмыскерлер ереуілі бүкіл елдегі теміржол қатынасына айтарлықтай кесірін тигізді.
Жұмыстың 20 сағатқа тоқтап тұруына пойыз машинистерінің жалақыны көбейтіп, жұмыс уақытын қысқартуды талап етіп, ереуілге шыққаны себеп болған. Кей жерлерде ұлттық және жергілікті қызметтер 80%-ға дейін қысқарып, көптеген жолаушылар үшін қолайсыздық тудырды.
— Бүгін таңертең сағат 6:17-де жүретін пойызға отыру үшін келдім. Ал дисплейде еш жазу болмады. Мен бірден ақпараттық орталыққа жүгірдім. Ол жердегілердің ашулы болғаны сонша, көмектескісі келмеді. Мүлдем.
— Иә, талаптарды түсінемін. Мен бір нәрсені жақсарту керек екенін түсінемін. Машинистердің талабы шектен тыс деп ойлаймын. Бірақ тараптар ақыры бір-бірімен келісімге келуге тиіс. Ол менің ашуыма тиіп тұр. Мұның ауыртпалығын біз, жолаушылар көтеруіміз керек, - дейді жолаушылар.
Deutsche Bahn мен кәсіподақтар арасындағы дау бастапқы сатысында, бірақ қазірдің өзінде ерекше күрделі болып көрінеді. Келіссөздер бейсенбіде қайта жалғасуы тиіс еді, бірақ кәсіподақтар ереуілге шыққаннан кейін теміржол операторы кездесуді өткізбеді.
