Германияда Украинаға қару-жарақ жеткізуге қарсы петиция басталды
БРЮССЕЛЬ. ҚазАқпарат – Германияда бір топ азамат Украинаға қару-жарақ жеткізуге қарсы петиция бастамасын көтерді, деп хабарлайды ҚазАқпарат меншікті тілшісі.
Change.org сайтында Украинаны қаруландыруды тоқтатуға шақырған петиция жарияланған.
«Үшінші дүниежүзілік соғыстың алдын алу қажет. Бізге қару емес, дипломатия керек!» - деп жазады үндеу бастамашылары.
Қазіргі уақытта петицияға 12 мыңнан астам интернет қолданушысы қол қойған.
Еуропалық БАҚ-тың жазуынша, Германия канцлері Олаф Шольц ішкі және сыртқы қысым үдеген жағдайға түсті. Батыс одақтастары мен Германия билеуші коалициясының мүшелері канцлер-социал-демократты Украина күштерін ауыр қару-жарақпен қамтамасыз етуге шақырып, жиі әрі қатал сынап жатыр.
