ГЛОНАСС-тың үш серігінің жоғалып кетуіне байланысты "Энергия" мен Ресғарыш басшылығы жазаға тартылды
АСТАНА. 30 желтоқсан. ҚазАқпарат /Сара Қабиқызы/ - ГЛОНАСС-тың үш серігінің жоғалып кетуіне байланысты "Энергия" РКК басшысы Вячеслав Филин мен Ресғарыш бастығының орынбасары Виктор Ремишевский жұмысынан босатылып, Ресғарыштың бастығы Анатолий Перминовке сөгіс берілді.
Бұл туралы Кремльдің баспасөз қызметі хабарлады.
"РФ Вице-премьері Сергей Ивановтың Ресей Президенті Дмитрий Медведевке берген есебінің қорытындыларына сәйкес, ДМ-3-тің жылдамдық блогындағы жанармай құюға қатысты есептерде қателік жібергендері үшін "Энергия" РКК вице-президенті, бас конструкторы Вячеслав Филинді және Ресғарыш бастығының орынбасары Виктор Ремишевскийді қызметтерінен босату жайлы шешім қабылданды″, - деп хабарлады дереккөз.
