Голливуд жұлдызы Джонни Депп грек аралын сатып алды

АСТАНА. ҚазАқпарат - Белгілі актёр Джонни Депп €4,2 млн шағын грек аралын сатып алды. Бұл туралы Афина жаңалықтар агенттігіне лондондық Proto Organization Ltd жылжымайтын мүлік компаниясының БАҚ-пен байланыс бойынша өкілі Стивен Тейлор хабарлады.

«Грекияға жұлдыздардың көбі қызығады. Олар мұнда жер телімін немесе шағын аралдарды сатып алғысы келеді. Шілденің соңында Stroggino аралына Джонни Депп келеді. Ол аралды осыдан екі күн бұрын сатып алған», - деді ол.

Көлемі 0,2 шаршы км болатын аралда қазір ешкім тұрмайды. Ал Депп Австралияда «Кариб теңізінің қарақшылары» фильмінің түсіріліміне қатысып жатыр.

Еске сала кетейік, жуырда грек үкіметі дағдарыстан шығу үшін Жерорта теңізіндегі ондаған ешкім мекендемейтін аралды саудаға шығарған болатын.