Головкин бапкері: әкесінің қазасынан кейін Геннадий қатты өзгерді

АСТАНА. ҚазАқпарат - Геннадий Головкин әкесі өмірден озғаннан кейін жаттығу алаңына мүлдем өзге адам болып оралды, дейді спортшының бапкері Абель Санчес. Бұл туралы «boxingnews.kz» сайты жазды.

«Меніңше, ол өзгерді. Өткен жылдың басындағы оқиға оған психологиялық тұрғыда қатты әсер етті. Әкесі өмірден озғаннан кейін дайындық алаңында мүлдем басқа Головкинді көрдім. Осы орайда мен жауапкершілігін рингте ғана емес, басқа уақытта да көріп, оның есейе түскенің байқадым», - деді бапкер Лос-Анджелестеге баспасөз мәслихаты барысында. «Қазіргі кезде ол - отағасы. Меніңше, оның өмірдегі бағдары мен мақсаты драмалық өзгерістерге ұшырады»,-деп түйді Санчес. Еске сала кетейік, әлем чемпионы Геннадий Головкиннің әкесі 2014 жылдың 18 ақпанында 69 жасында дүние салды. Бұдан бұрын хабарланғандай, Головкин 21 ақпан күнi Монакода соққысы ауыр Мартин Мюрреймен шаршы алаңға шығады. Қазіргі кезде Геннадий Абель Санчестің басшылығымен «BigBear» базасында жаттығып жатыр.