Головкиннiң промоутерi: Геннадиймен шыққан қарсыластар дивизионда ең жоғары гонорар алды

АСТАНА. ҚазАқпарат - Бiрнеше күн бұрын орта салмақта бұрынғы әлем чемпионы, жеңiлiссiз келе жатқан америкалық боксшы Питер Куиллин сұхбаттардың бiрiнде 32 жастағы қазақстандық боксшы Геннадий Головкин туралы сөз қозғап, оны қаржылық тұрғыда тартымды емес екендiгiн айтқан болатын. Куиллиннiң айтуынша, Головкин - аз қаражат үшiн үлкен қатердiң өзi.Головкиннiң промоутерi Том Лёффлер соған орай өз пiкiрiн бiлдiрiптi.

Промоутердiң мәлiм еткенiндей, Головкиннiң қарсыластары қыруар гонорарларға ие болған. Мысалы, бұрынғы чемпион Дэниэл Гил Головкинмен жекпе-жек өткiзгенi үшiн 600 мың доллар алған. Питер Куиллин соңғы үш жекпе-жекте 340, 400 және 450 мың долларға ие болған. Куиллин чемпиондық атақ үшiн болған төрт кездесуде кештiң басты жекпе-жегiне қатыспаған.

«Питердiң осылай сөйлеуi, аса қызық жағдай, менiңше ол Головкинмен кездеспеу үшiн айта салған», - деп келтiредi Леффлердiң сөзiн BoxingScene.com. сайтында. - Айта кетейiн, PPV жекпе-жектерiн санамағанда Геннадийдiң қарсыластары дивизионда ең жоғары қаражаттарға ие болып келеді. Маклинға, Гилға, Рубиоға қараңыздар, оларға ең көп ақша төлендi, - деді ол.

Еске сала кетейiк, Головкин келесi ұрысты 21 ақпанда Мартин Мюррейге қарсы өткiзбек.