Грузия Ресейдің ДСҰ-ға кіруіне алтыншы рет келісім бермеді
АСТАНА. 10 қазан. ҚазАқпарат - Грузия мен Ресейдің кезекті келіссөздерінің алтыншы раунды сәтсіз аяқталды. Бұл туралы 8 қазанда Швейцарияға грузия келіссөзі делегациясын басқарып барған Грузия сыртқы істер министрінің орынбасары Серги Капанадзе мәлім етті.
«Келіссөздер аяқталды, бірақ біз оның сәтсіз болғанын айта аламыз, ол орта жолда үзілді», деген Капанадзенің сөзін «Голос Америки» радиостансасы жеткізді.
Грузия СІМ басшысының орынбасары: «егер Мәскеу Тбилисидің Псоу өзенінде (грузин-ресей шекарасындағы Абхаз учаскесі) халықаралық бақылау орналастыру жөніндегі және Рокск тоннеліндегі (грузин-ресей шекарасындағы оңтүстік Осетин учаскесі) талаптарына құлақ аспауды жалғастыратын болса, Грузия Ресейдің ДСҰ-ға кіруіне келісім беруі мүмкін емес», - деп түсіндіреді.
Өз кезегінде Ресей делегациясының басшысы Максим Медведков: «Грузия талаптары ДСҰ нормаларымен ешқандай сәйкес келмейді», - деп тұжырымдады.
