Грузияда ел президентіне импичмент жариялау процедурасын бастауға рұқсат берілді
Грузияның Конституциялық соты ел президенті Саломе Зурабишвилиге импичмент жариялау процедурасын бастауға рұқсат берді. Kazinform бұл туралы ВВС-ге сілтеме жасап хабарлайды.
Грузия тарихында бұрын-соңды болмаған президентке импичмент жариялау ісін 9 судья үш күн бойы қарады. Шешім қабылдау үшін олардың кем дегенде алтауының келісімі қажет болды.
Сот шешімін оқыған Конституциялық сот төрағасы Мераб Турав атап өткендей, президент шетелге үш рет сапары кезінде үкіметтің келісімінсіз халықаралық қатынастар саласындағы өкілеттігін жүзеге асырып, сол арқылы Конституцияның 52-бабын бұзды.
Бұл – Конституциялық соттың түпкілікті және шағымдануға немесе қайта қарауға жатпайтын қорытындысы.
Елдің басқарушы партиясы импичмент мәселесі бойынша сотқа бір ай бұрын жүгінген болатын.
Тәжірибелі дипломат, Францияның тумасы Саломе Зурабишвили 2018 жылы Грузиядағы президент сайлауында жеңіске жеткен еді. Ол – тәуелсіз Грузия тарихындағы тұңғыш әйел президент.
Бұған дейін «Грузия арманы» басқарушы партиясы іс басындағы президентке импичмент жариялау бастамасын көтергенін жазған болатынбыз.
