Гүлмира Сатыбалдыны тұтқында ұстау мерзімі ұзартылды
НҰР-СҰЛТАН. ҚазАқпарат – Осыған дейін 2 ай мерзімге қамауға алынған Гүлмира Сатыбалды тағы бір ай тұтқында болады, деп хабарлайды ҚазАқпарат тілшісі Нұр-Сұлтан қаласы сотының баспасөз қызметіне сілтеме жасап.
«2022 жылғы 13 мамырда Нұрсұлтан қаласының мамандандырылған ауданаралық тергеу соты күдікті Гүлмира Сатыбалдыға қатысты қамауда ұстау түріндегі санкцияланған бұлтартпау шарасының мерзімін 1 ай мерзімге ұзартты», - делінген хабарламада.
Еске сала кетсек, биыл 18 наурызда елорда соты Гүлмира Сатыбалдыны 2 ай мерзімге қамауға алуға санкция берген еді.
Айта кетейік, күдіктінің бұрынғы жұбайы Қайрат Сатыбалдыны тұтқында ұстау мерзімі де ұзартылды.
Ол туралы Нұр-Сұлтан қалалық мамандандырылған ауданаралық тергеу соты 12 мамыр күні жария етті.
Атап айтқанда, күдікті Қайрат Сатыбалды және Қайрат Боранбаевқа да қатысты тұтқында ұстау түрінде санкцияланған бұлтартпау іс-шарасының мерзімі тағы 1 айға созылды.
