Х. Карзай армияға президенттік сайлау күні жауынгерлік операцияларды тоқтатуды бұйырды
АСТАНА. Тамыздың 14-і. ҚазАқпарат - Ауғанстан Президенті Хамид Карзай үкімет әскеріне тамыздың 20-сына белгіленген президенттік сайлау кезінде барлық жауынгерлік операцияларды тоқтату туралы бұйрық берді,
деп хабарлайды Associated Press агенттігі.
Бұл мәлімдемені ауған басшысы ұлттық радиода сөйлеген сөзінде жасады. Ол сондай-ақ, «Талибан» содырларын осыдан үлгі алуға және ел азаматтарына еркін дауыс беруге мүмкіндік жасауға шақырды.
Ауғанстанда президенттік сайлау тамыздың 20-сында өтеді. Ел президенттігіне 40-қа жуық үміткер таласады.
