«Хабар» телеарнасы спорт жанкүйерлеріне бокс кешін ұсынғалы отыр

АСТАНА. ҚазАқпарат - 26-27 мамыр күндері «Хабар» телеарнасы спорт жанкүйерлеріне бокс кешін ұсынғалы отыр. Бүкіләлемдік бокс сериясындағы (WSB) жартылай финалдық кездесу екі күнге жоспарланғаны белгілі. «Астана арландары» Лондонда «Бритиш Лайнхартс» (British Lionhearts) командасына қарсы өткізетін бәсекені «Хабар» телеарнасы тікелей эфирде көрсетеді. Бұл кездесулер С1 және С2 салмақ дәрежелерінде өткізіледі.

Алғашқы күнгі бокс кеші ертең, 26 мамырда, Астана уақытымен 01:00-де басталады. Ал 27 мамыр күні С2 салмақ дәрежесіндегі боксшылардың тартысты бәсекесін ел тұрғындары тағы да 01:00 сағаттан бастап көру мүмкіндігіне ие болмақ.

Бұған дейін хабарлағанындай, «Astana Arlans» - «British Lionhearts» арасында екі күндік кездесуде өнер көрсететін қазақстандық боксшылардың тізімі жарияланды:

«Astana Arlans» құрамы:

С1

49 кг: Жомарт Ержан

56 кг: Нұрсұлтан Көшеғұлов

64 кг: Самат Башенов

75 кг: Мейірім Нұрсұлтанов

91 кг: Мұхамеджан Еркін

С2

52 кг: Азамат Исақұлов

60 кг: Зәкір Сафиуллин

69 кг: Асланбек Шымбергенов

81 кг: Нұрдәулет Жарманов

+91 кг: Қамшыбек Қоңқабаев.

«Астана арландары» командасын тартысты бәсекелер күтіп тұр. Спорт сүйер қауым Қазақстанның былғары қолғап шеберлері мықты екендіктерін тағы да бір дәлелдейді деген сенімде.