Хакерлер АҚШ-тағы сайлау барысына ықпал ете алмады -Трамп
АСТАНА. ҚазАқпарат - АҚШ-тың сайланған президенті Дональд Трамп кибершабуылдардың елдегі сайлау науқанына ықпал ете алмағандығын мәлім етті. Бұл туралы Риа Новости хабарлады.
«Ресей, Қытай сияқты өзге де көптеген мемлекеттер, топтар мен азаматтар демократтар комитетін қоса алғанда біздің мемлекетіміздің мекемелеріміз, кәсіпорындар мен ұйымдарымыздың инфрақұрылымдарына ұдай кіруге ұмтылып жатқанымен олар сайлау барысында ешқандай ықпал ете алмады. Олар дауыс беру құрылғыларына да кедергі келтіре алмады»,-делінген Трамптың мәлімдемесінде.
Бұған қоса, Трамп АҚШ-тың барлау қызметінің өкілдерімен де кездескенін айтып, оларға зор алғысын білдірді.
Осыған дейін сайланған президент Дональд Трамп конгрес өкілдерінен кибершабуылдар туралы ақпаратты NBC арнасының қайдан алғандығына тексеру жүргізуді тапсырды.
