Хакерлер FTX криптобиржасынан 415 млн доллар ұрлаған
АСТАНА. ТАСС - ҚазАқпарат – Банкротқа ұшыраған FTX криптовалюта биржасы хакерлер 415 млн долларды ұрлағанын мәлімдеді. Бұл туралы ҚазАқпарат ТАСС агенттігіне сілтеме жасап хабарлайды.
CNBC телеарнасының хабарлауынша, компания заңгерлері мен кеңесшілерінің мәліметі бойынша, $323 млн FTX.com-нан ұрланса, $90 млн америкалық бөлімшесінен жымқырылған.
Сонымен қатар $2 млн Alameda Research хедж-қорынан шығарылған. Болжам бойынша, ұрлық 2022 жылдың қарашасында биржа құлағаннан кейін болған жүйенің бұзылуымен байланысты. Жалпы FTX-тің жойылған активтерінің соммасы – 5,5 млрд доллар. Бұл сомманың ішінде FTX негізін қалаушы Сэм Бэнкман-Фридтің Багам аралдарындағы жекеменшігі бар, оның құны жүздеген миллион доллар деп бағаланып отыр.
Қарашаның басында FTX компаниясы Twitter-де банкрот болғаны туралы мәлімдеді, ал оның басшысы Бэнкман-Фрид отставкаға кетті. АҚШ-тың бағалы құжаттар мен биржа комиссиясы бизнесменнің өтімділік дағдарысқа әкеп соққан әрекеттерге қатысы бар-жоғын анықтап жатыр. Кәсіпкер өзіне айтылған айыптың бәрін жоққа шығарып отыр.
Фото: AP Photo/ Marta Lavandier
