Халық санағын өткізуге 73 мыңнан астам маман қажет - Статистика агенттігі

АСТАНА. Қаңтардың 13-і. ҚазАқпарат /Арман Асқаров/ - Еліміздегі ұлттық халық санағын өткізу үшін 73 мың 500 маман қажет. Бұл туралы бүгін Премьер-Министр Кәрім Мәсімовтың қатысуымен өткен Статистика агенттігінің кеңейтілген алқа мәжілісінде аталмыш ведомствоның басшысы Анар Мешімбаева мәлім етті,

деп хабарлайды ҚазАқпарат. «Бүгінде халық санағына дайындық жұмыстары ойдағыдай атқарылды деп ойлаймын. Халық санағы бойынша барлық деңгейдегі комиссиялар құрылып, іс-қимыл жоспарлары бекітілді. Алдағы уақытта еліміздегі ұлттық халық санағын өткізу үшін 73 мың 500 маман қажет. Сондай-ақ осынау үлкен саяси мәні бар іс-шара жайында толыққанды ақпарат алу үшін республика бойынша тегін телефон желісін ашу керек. Ол арқылы өңірлердегі халық бізге емін-еркін телефон шалып, халық санағын өткізудің мән-жайын біле алады», - деді Статистика агенттігінің төрайымы Анар Мешімбаева. Естеріңізге сала кетейік, еліміздегі ұлттық халық санағы ағымдағы жылғы ақпанның 25-і мен наурыз айының 6-сы аралығында өтетін болады.