Халықаралық резервтер қыркүйекте 2,1 млрд долларға төмендеді – Ұлттық банк
АСТАНА. ҚазАқпарат – Халықаралық резервтер қыркүйекте 2,1 млрд долларға төмендеді. Бұл туралы Үкімет отырысында ҚР Ұлттық банкінің төрағасы Ғалымжан Пірматов айтты, деп хабарлайды ҚазАқпарат тілшісі.
«Жалпы халықаралық резервтер қыркүйек айында 2,1 млрд долларға төмендеп, 84,4 млрд долларды құрады. Ақпан-наурыз айларында интервенциялар жүргізу, мемлекеттік борышты төлеу, сондай-ақ алтын бағасының төмендеуі аясында жыл басынан бері алтын-валюта активтерінің 1,6 млрд долларға төмендеуіне қарамастан алтын-валюта активтерінің деңгейі жеткілікті және импорттың шамамен 7,3 айын жабуға мүмкіндік береді», – деді Ұлттық банк төрағасы.
Оның дерегінше, республикалық бюджетке 3,7 трлн теңге сомасына трансферттер бөлу үшін жыл басынан бастап 3,4 млрд долларға валюталық активтер сатылды.
«Дамыған елдердің орталық банктерінің ақша-кредит саясатын күшейту жөніндегі риторикасы аясында облигациялар мен акция нарықтары жыл басынан бері құлдырағанын көрсетті. Бұл қыркүйек айында Ұлттық қор активтерінің төмендеуіне әсер етті», - деді Ғалымжан Пірматов.
