ХАМАС кепілге алынған израильдік алты азаматты босату мерзімін жариялады
АСТАНА. KAZINFORM – Палестинаның ХАМАС радикалдық қозғалысы кепілге алынған Израиль азаматы Арбель Йехудты 30 қаңтарда босатады, деп хабарлайды Израиль премьер-министрі Биньямин Нетаньяху кеңсесі. Бұл туралы ресейлік ТАСС ақпарат агенттігі жазды.
- Премьер-министр Нетаньяху басқарған нық және шешуші келіссөздерден кейін ХАМАС кері шегінді және бейсенбіде (30 қаңтар) кепілге алынғандарды босатудың тағы бір раундын өткізеді. Бұл раунд барысында бейбіт азамат Арбель Йехуд, әскери қызметкер Агам Бергер және тағы бір ұрланған адам босатылады, - делінген хабарламада.
Бұдан басқа, 1 ақпанда кепілге алынған тағы үш адам босатылады.
Бұған дейін Премьер-министрдің кеңесшісі және Катар Сыртқы істер министрлігінің ресми өкілі Маджид бен Мұхаммед әл-Ансари Арбель Йехудтың 31 қаңтарға дейін босатылатынын хабарлаған болатын. Израиль билігі бұған дейін оның өткен аптада босатылуы керек екенін, бірақ ХАМАС оны Газа секторында ұстап, келісімді бұзғанын мәлімдеген.
Бұған дейін Израиль 90 палестиналық тұтқынды, ал палестиналық ХАМАС ұйымы израильдік тұтқындардың екінші тобын босатты.
