Хантавирус анықталған лайнердегі жолаушылар саяхатты жалғастырады

Министрліктің хабарлауынша, кеміргіштерге тестілеу Аргентинаның оңтүстіктегі Ушуайя қаласында және круиздік кеменің жөнелту пунктінде жүргізіледі.

Бұл шара голландиялық ерлі-зайыпты мен Германия азаматы хантавирустық инфекциядан қайтыс болғаннан кейін қолға алынды.

150-ге жуық жолаушысы бар кеме Тенерифеге үш күн ішінде жетеді деп жоспарланған. Испанияның денсаулық сақтау министрі борттағы адамдардан әлі аурудың белгілері пайда болмағанын айтты.

Дүниежүзілік денсаулық сақтау ұйымының (ДДҰ) мәліметінше, үйге оралған және Цюрихте емделіп жатқан Швейцария азаматын қосқанда барлығы 8 адам вирусты жұқтырған. Олардың үшеуінің диагнозы зертханалық зерттеулермен расталды.

Ауру жолаушыларды эвакуациялау

Дүниежүзілік денсаулық сақтау ұйымының басшысы Тедрос Гебрейесус X әлеуметтік желісіндегі хабарламасында сәрсенбі күні кемеден эвакуацияланған үш адамның Нидерландыға емделуге жіберілгенін айтты. Мәліметтерге қарағанда, олардың екеуі ауыр жағдайда.

Нидерланды сыртқы істер министрлігі хабарлағандай, бұл үш жолаушының бірі — Нидерланды, қалған екеуі Германия және Ұлыбритания азаматы.

Кеме операторы Oceanwide Expeditions компаниясының мәліметіне сәйкес, эвакуацияланғандардың екеуінде өткір симптомдар байқалған, ал үшіншісі 2 мамырда кемеде қайтыс болған неміс жолаушысымен тығыз байланыста болған. Нидерланды билігі бұл адамның вирус жұқтырған болуы мүмкін екенін хабарлады.

Бұған дейін Кабо-Вердеден Амстердамға екі науқасты таситын бір ұшақ Мароккода жанармай құю үшін қонуы керек еді, алайда Солтүстік Африка елі рұқсат бермеді. Сондықтан ұшақ мәжбүрлі түрде Гран-Канарияға қонды.

— Гран-Канарияда болған кезде борт дәрігері науқастың денсаулығы күрт нашарлағанын хабарлаған. Қазіргі уақытта ол жаңа ұшақ келгенін күтуде, — деп жазды Испания денсаулық сақтау министрлігі.

Бұрын кемеден эвакуацияланған британдық жолаушы Оңтүстік Африкадағы реанимация бөлімінде жатыр.

Испания үкіметінің жауабы

Испания денсаулық сақтау министрі Моника Гарсияның мәлімдегендей, круиздік лайнердегі қалған барлық жолаушыдан ауру белгілері анықталмаған.

— Кеме Канар аралындағы Тенерифе портына тоқтағаннан кейін шетелдік азаматтар өз елдеріне қайтарылатын болады. Олардың Испанияда карантиннен өтуі қажет емес. Бұл мәселені әр елдің үкіметі өздері шешуі тиіс, — деді Гарсия. 

Алайда 14 испан азаматы Мадридтегі ауруханаға ұшақпен жеткізіліп, карантиннен өтеді.

Испания ішкі істер министрі Фернандо Гранде-Марласка Канар аралдары қазіргі жағдайда ең қолайлы порт екенін атап өтті. 

Круиздік лайнер наурыз айында Аргентинадағы Ушуайядан Антарктика экспедициясына аттанған.

ДДҰ мәлімдегендей, голландиялық жұп ұшаққа мінер алдында Аргентинада вирус жұқтырған болуы мүмкін деген болжам бар. Сондай-ақ ұйым көпшілік үшін қауіп төмен болғандықтан, саяхатқа ешқандай шектеу қоймады.

Еске салайық, екі ай уақыт бұрын Кабо-Вердеде ішек инфекциясынан 4 британиялық турист қайтыс болған еді.