Хоккей: «Барыс» «Ақ барыстан» қарымта қайтаруға тырысады

АСТАНА. Наурыздың 5-і. ҚазАқпарат /Ернұр Ақанбай/ - Бүгін елордада Астананың «Барыс» хоккей клубы Қазанның «Ақ барысын» қабылдайды.

Бұл қос команданың Гагарин кубогы ширек финалындағы үшінші кездесуі, деп хабарлайды ҚазАқпарат. Бұл кезеңде клубтар үш мәрте жеңіске жеткенше ойнайды. Әзірге жалпы есепте 2:0-мен «Ақ барыстың» мерейі үстем болып тұр. Наурыздың 2-сі және 3-і күндері Қазанда өткен екі ойында да олар біздің командадан басым түсті. Сондықтан плей-офф кезеңіндегі жарысты жалғастырғысы келсе, «Барысқа» бүгін міндетті түрде жеңіс қажет. Егер бүгінгі ойында «Барыс» басым түссе, командалар жеңімпазды анықтау үшін тағы да кездесетін болады. Матч «Қазақстан» спорт сарайында өтеді.