«Huawei-Almaty» компаниясы ХАТУ студенттеріне 10 білім грантын табыстады
АЛМАТЫ. 9 тамыз. ҚазАқпарат /Нәзира Елеухан/ - Бүгін Алматыда «Huawei-Almaty» компаниясы ашық жүйелер және бұлтты есептеулер бойынша ғылыми-зерттеу зертханасының ашылу салтанатында Халықаралық ақпараттық технологиялар университеті бакалавриатының техникалық мамандық бойынша оқитын студенттеріне 10 білім грантын табыстады.
"Білім гранттарын ұсыну жобалары жоғары білікті ІТ мамандарды оқыту мен дайындауға платформа құруға және "бұлтты есептеулер" саласындағы ғылыми-зерттеу жұмыстарын жүргізуге жағдайлар жасауға мүмкіндік береді деген үмітеміз", - деді «Huawei-Almaty» компаниясының басшысы У Чангао шара барысында.
Компания көздеген сыйақы қоры 110 000 АҚШ долларынан асады. Сыйақы 4 жыл мерзіміне берілген. Оқу орнында ерекше көзге түскен студенттер 3-курстан соң компанияның Қытайда орналасқан штаб-пәтерінде тәжірибеден өту мүмкіндігіне ие болады. Ал, оқуды аяқтаған соң «Huawei-Almaty» компаниясына жұмысқа тұру құқығына ие болмақ.
