Илон Маск қайтадан триллионер атанды
АСТАНА. KAZINFORM — Tesla мен SpaceX акцияларының қымбаттауынан кейін Илон Маск қайтадан триллионер атанды. Оның байлығы бірнеше күн ішінде 30,6 млрд долларға өсті, деп хабарлайды Kazinform агенттігі ТАСС-қа сілтеме жасап.
Forbes журналының мәліметінше, 5 қазанда сауда-саттық ашылғаннан кейін Tesla мен SpaceX акцияларының өсуі Масктің байлығын қайтадан 1 трлн доллардан асырған.
Басылымның бағалауынша, Масктің байлығы 1 трлн долларға жетіп, 2 қазанмен салыстырғанда 30,6 млрд долларға артқан. Ол әлемдегі ең бай адам мәртебесін сақтап отыр. Екінші орында тұрған Джефф Безостың байлығы 371,5 млрд долларға бағаланады.
Маск алғаш рет маусым айында SpaceX-тің Nasdaq биржасына шығуынан кейін триллионер атанған. Алайда бірнеше күннен соң SpaceX пен Tesla акцияларының арзандауына байланысты бұл мәртебесінен айырылған. Соңғы күндері екі компанияның да акциялары қымбаттап, кәсіпкердің байлығы қайтадан 1 трлн доллар межесіне жақындады. Тек 2 қазанда Tesla-ның үшінші тоқсандағы көлік жеткізілімі сарапшылар күткеннен жоғары болғаннан кейін Масктің байлығы 61 млрд долларға артқан.
5 қазан таңертең Tesla акциялары 1 пайыздан астам, ал SpaceX акциялары 5 пайыздан астам қымбаттап, бір акцияның бағасы 167 долларға жетті.
SpaceX акцияларының өсуіне Morgan Stanley сарапшыларының компания бағалы қағаздарын төмен бағаланған деп есептеуі, сондай-ақ өткен аптада Starship кемесінің орбитаға алғаш рет сәтті шығарылуы әсер етті.
Бұған дейін Маск рекордтық көрсеткішке жеткеннен кейін екі апта өтпей жатып триллионер мәртебесінен айырылған еді. Оның активтерінің құны төмендей бастаған. 24 маусымда кәсіпкердің капиталы 957 млрд долларға бағаланып, ол триллионер мәртебесін жоғалтқан.
Сонымен қатар Илон Маск Трамптың «суперинтеллект» туралы мәлімдемесінен кейін SpaceXAI атауын өзгертетіні белгілі болды.
