09:15, 29 Қазан 2018 | GMT +6
Индонезияда жолаушылар ұшағы апатқа ұшырады
АСТАНА. ҚазАқпарат - Индонезияның Lion Air әуе компаниясының жолаушылар ұшағы бүгін таңертең апатқа ұшырады, деп хабарлайды ҚазАқпарат Jakarta Post-қа сілтеме жасап.
Jakarta Post ақпараты бойынша, ұшақ жергілікті уақытпен таңғы сағат 6:20-да әуеге көтерілген. 13 минут өткеннен кейін ұшақ радардан жоғалып, онымен байланыс үзілген.
Индонезия құтқару қызметінің ақпараты бойынша, Джакартадан Панкалпинангқа ұшып бара жатқан Boeing 737 MAX 8 ұшағы теңізге құлаған.
Бортта қанша жолаушы және экипаж мүшесі болғаны туралы, сондай-ақ ұшақтың неліктен апатқа ұшырағаны жайлы әзірге нақты ақпарат жоқ.