Индустрияландыру бағдарламасы табысты жүзеге асқан жағдайда 5 жылдың ішінде Қазақстан экономикасы 30 пайызға өседі - Н. Назарбаев
аурыздың 12-сі. ҚазАқпарат /Ернұр Ақанбай/ - Үдемелі индустриялық-инновациялық даму бағдарламасы табысты жүзеге асқан жағдайда 5 жылдың ішінде Қазақстан экономикасы 30 пайызға өсетін болады.
Бұл туралы бүгін Ақордада Үкімет мүшелерінің және әкімдердің қатысуымен өткен индустриялық дамуға қатысты кеңесте Елбасы Нұрсұлтан Назарбаев айтты, деп хабарлайды ҚазАқпарат.
«Біз үлкен жұмыстың алдында тұрмыз - индустрияладыру бағдарламасы жүзеге асырылғалы жатыр. Жолдау жарияланғаннан бері бір ай өтті, осы аралықта тиісті мәселелер қағаз жүзінде шешілді, бағдарлама қабылданды, оның мән-маңызы халыққа түсіндіріліп жатыр. Әр облыста, ауданда, қалада қандай нысандар іске қосылатыны белгіленді. Егер біз бағдарламаны орындайтын болсақ, бір жылдың ішінде 25 мың тұрақты жұмыс орны құрылады, 5 жылдың ішінде экономикамыз 30 пайызға өседі», деді кеңесте Н. Назарбаев.
Елбасы бағдарлама халықтың әл-ауқатын одан әрі жақсартуға бағытталғанын атап көрсетті. «Индустрияландыру бағдарламасының шеңберінде жаңа мамандықтар пайда болады, жастарымыз басқаша өмір сүреді. Бағдарламаны жүзеге асыру біздің ортақ міндетіміз», деді Мемлекет басшысы.
