Инфляция деңгейі тұрақты - Ұлттық банк төрағасы
АЛМАТЫ. Қыркүйектің 15-і. ҚазАқпарат /Ерлік Ержанұлы/ - Елдегі макроэкономиакалық көрсеткіштер өзгерген жоқ, ахуал тұрақты. Оны Ұлттық банк төрағасы бүгін Алматыда өткізген баспасөз мәслихатында мәлімдеді, деп хабарлайды ҚазАқпарат.
ҚР Статитика агенттігінің ресми деректері бойынша тамызда тұтыну бағаларының индексі 100 пайыз болды. Өткен жылдың сәйкес кезеңінде бұл 100,2 пайызды құраған еді. Ұлттық банк төрағасы Григорий Марченконың айтуынша, қаңтар-тамыз айларының қорытындысы бойынша инфляция 4,6 пайыз. Былтыр ол 4,3 пайыз болған. Инфляцияның жылдық көрсеткіші соңғы 1,5 жылғы деңгейде тұр. Тамызда азық-түлік тауарларының бағасы - 5,8 пайыз, азық-түлікке жатпайтын тауарлар - 5,7 пайыз, ақылы қызмет - 8,3 пайызға өсті. 2009 жылдың сәйкес кезеңінде ол азық-түлік тауарларында - 3 пайыз, азық-түлікке жатпайтын тауарларда - 8,6 пайыз, ақылы қызмет көрсетуде - 8,4 пайызды құраған болатын.
