Иорданияда ҚР Тұңғыш Президенті күніне орай салтанатты кеш өтті

АСТАНА. 2 желтоқсан. ҚазАқпарат - 1 желтоқсанда Қазақстан Республикасының Тұңғыш Президенті күнін атап өтуіне орай Иордания Хашимит Корольдігінің астанасы - Амман қаласында Корольдіктің саяси, қоғамдық, бизнес орталарының, дипломатиялық миссияларының, жергілікті және аймақтық ақпарат, диаспора өкілдерінің қатысуымен салтанатты кеш ұйымдастырылды. Бұл туралы ҚР Сыртқы істер министрлігінен хабарлады.

Ресми қонақасыға Иорданияның бұрынғы Премьер-министрі, Ислам әлемі ғылым академиясының президенті, Әлемдік қатынастар академиясының президенті, профессор Әбдүс-Сәлам әл-Мәджали, Иордания Король сарайының басшысы, бұрынғы Сыртқы істер министрі Маруан әл-Қасим, ИХК Сыртқы істер министрлігінің Бас хатшысы Мұхаммед Дахер жоғарғы мәртебелі тұлғалар қатысты.

Жиналған мәртебелі қауым алдында сөйлеген сөзінде Елші Б.Сәрсенбаев Елбасы - Қазақстан Республикасының Тұңғыш Президенті Н.Ә.Назарбаевтың қайратты да қажырлы көшбасшылық рөлі, көп векторлы саясаты туралы кеңінен баяндады.

Қабылдауға қатысқан иорданиялық тараптың басты ресми қонағы - Иордания Хашимит Корольдігінің экс-премьер-министрі, профессор Әбдүс-Сәлам әл-Мәджали өз кезегінде Иордания халқының ыстық ықыласты, ізгі ниетті құттықтауларын жеткізіп, Елбасы - Қазақстанның Тұңғыш Президенті Н.Назарбаевтың заманымыздың аса ірі реформаторлық тұлғасына, еліміздің жемісті даму жолы мен айрықша қоғамдық моделіне аса жоғары баға берді.

Аталған іс-шара барысында қонақтарға ағылшын тілінде Қазақстан туралы деректі кинофильмі көрсетіліп, қазақтың ұлттық тағамдары ұсынылды.