Иракта 11 министрлік қысқартылды
АСТАНА. ҚазАқпарат - Ирактың премьер-министрі Хейдар аль-Абади ірі мемлекеттік лауазымдарды қысқарту және біршама министрліктерді біріктіру туралы жарлық шығарды. Бұл туралы Министрлер кеңесі (Үкімет) төрағасының баспасөз қызметіне сілтемемен шетелдік БАҚ хабарлады.
«Жалпыұлттық мүддеге сай, Ирак конституциясының 78-бабына сәйкес және елдің Өкілдер кеңесінің (парламент) қолдауымен елдегі министрліктер санын 33-тен 22-ге қысқарту туралы шешім қабылданды», - делінген хабарламада.
Осылайша әл-Абади бір апта бұрын өзі ұсынған және оны үкімет пен парламент қолдаған реформалар тобының бір бөлігін жүзеге асыруды бастады. Оның ішіндегі ең маңыздылары вице-президент және премьер-министр орынбасарлары лауазымдарын жою болып табылады.
