Иракта Ислам мемлекеті содырлары мен канадалық әскерилер қақтығысы орын алды

АСТАНА. ҚазАқпарат - Канадалық әскерилер Иракта алғаш рет «Ислам мемлекетінің» содырларымен атысты. Қолбасшылық атап өткендей, мұны жергілікті жерде Батыс елдерінің сарбаздары мен ИМ содырлары арасындағы алғашқы қақтығыс деп атауға болады.

Бұл туралы би-би-си жазады.

Ирактағы канадалық миссия басшысы бригадалық генерал Мишель Руло оның сарбаздары миномет пен автомат пайдаланған содырларға снайперлік қарудан оқ атуға мәжбүр болғанын атап өтті.

Руло сөзіне қарағанда, оқиға канадалықтар Ирак әскерилеріне ИМ-ге қарсы шара жоспарын құруға көмектесуі кезінде болған.

Қазіргі уақытта Иракта шамамен 600 канадалық әскери орналастырылды.