Ирактың бұрынғы вице-премьері 7 жыл түрмеге кесілді
АСТАНА. Тамыздың 3-і. ҚазАқпарат- Ирактың бұрынғы вице-премьері, Саддам Хұсейннің тұсында іс жүзінде елдегі екінші адам болған Тарик Әзізді кеше Ирактың Жоғарғы трибуналы 7 жыл түрмеге кесті. Трибунал оны 1980 жылдары Киркук және Дияла провинцияларында күрд шиіттеріне қарсы ұйымдастырылған қуғын-сүргінге қатысқаны үшін кінәлі деп таныды. Саддам Хұсейннің немере бауыры - Әли Хасан әл-Мажидке де осындай үкім шығарылды,
деп хабарлайды ҚазАқпарат ИТАР-ТАССт агенттігіне сілтеме жасап.
Бұл - бұрынғы ирак режимінің басшыларына қатысты алтыншы сот амалы. Ағымдағы жылдың наурыз айында Жоғарғы трибунал 1992 жылы 42 саудагерді өлтіруге қатысқаны үшін екі адамды 15 жыл түрмеге кескен болатын. Халықаралық экономикалық оқшаулау жағдайында бірінші кезектегі тұтынылатын тауарлардың бағасын қолдан қымбаттатқандары үшін, саудагерлер биліктің шешімімен өлім жазасына кесілген.
