Иран Ормуз бұғазын ашудың шартын атады
АСТАНА. KAZINFORM – Иран Ислам революциясы сақшылар корпусының өкілі, бригада генералы Хосейн Мохебби Ормуз бұғазы арқылы кеме қатынасы АҚШ Иранның талаптарын қабылдаған жағдайда қайта жанданатынын мәлімдеді, деп хабарлайды Anadolu.
Иранның Tasnim ақпарат агенттігінің мәліметінше, Хосейн Мохебби бұл туралы Хормозган провинциясында Журналистер күніне арналған іс-шара барысында айтқан.
Оның сөзінше, Ормуз бұғазы Иран үшін тек экономикалық маңызы бар су жолы ғана емес, елдің географиялық және стратегиялық қуатының негізгі элементтерінің бірі саналады.
– Ормуз бұғазының жұмысын қайта бастау Иран белгілеген тетіктер мен шарттарға байланысты. Бұл Иран мен Оман арасындағы келіссөздерге қатысы жоқ, – деді Хосейн Мохебби.
Ол бұғаздың ашылуы АҚШ-тың Иран талаптарын қабылдауына және Вашингтонның өңірлік келіссөздерге араласудан бас тартуына байланысты екенін атап өтті.
– Егер АҚШ Иранның шарттарын қабылдаса, Ормуз бұғазы міндетті түрде ашылады, – деді ол.
Бұған дейін Иран мен Оманның Ормуз бұғазына қатысты келісімге жақындағаны хабарланған.
